Historia

 

 

Idea

 

"En num dall‘ Uniun da Musica Sagogn savein nus presentar a Vus nossa musica giuvenila. 22 musicants giuvens ella vegliadetgna denter 10 e 25 onns formeschan oz nossa Musica giuvenila Aspermont Sagogn (MGAS)." Cun quels plaids ha in dil gronds iniziants dalla MGAS, Ignaz Lombris, presentau l‘emprema gada igl onn 1994 la Musica giuvenila Aspermont Sagogn alla populaziun.

 

Emprema dirigenta dalla MGAS ei Michaela Lombris-Cavelti stada. Dapi la fundaziun ha ella mintg'onn puspei motivau las giuvnas ed ils giuvens musicants. Mintg'onn havein nus astgau presentar in bi e variont concert. Dapi igl onn 2009 ei la musica sut la bitgetta da Michael Cadruvi. Buca mo concerts e diversas representaziuns s'audan tiel programm digl onn, mobein era camps en fuorma cun sport e giugs ed entgins viadis sco per exempel egl Europa Park (gia 2 gadas) ni excursiuns ella regiun. Era ei la collaboraziun cull'Uniun da musica Sagogn vegnida adina pli e pli gronda, aschia che biars sunan ella Musica giuvenila Aspermont Sagogn sco era ell'Uniun da musica Sagogn.

 

Ins sa constatar cun bien sentiment: La Musica giuvenila Aspermont Sagogn ha en ses varga 20 onns d'existenza buca mo formau novas musicantas e novs musicants per l'Uniun da musica Sagogn, mobein era dau a biaras giuvnas ed a biars giuvens in'occupaziun duront il temps liber. Tier la fundaziun dalla Musica giuvenila Aspermont ha l'Uniun da musica Sagogn mess claras finamiras e persequitau quellas consequentamein entochen oz.

 

Finamiras

 

Primo:

La MGAS vul dar la pusseivladad a nos musicants da sescolar musicalmein . Buc mo il sunar, era il plascher da sunar vegn aspiraus oravontut.

 

 

Secundo:

En ina musica giuvenila emprendan ils scolars e las scolaras gia baul da sunar ensemen e da cooperar en ina structura sozio-culturala.

 

 

Terzo:

Els retscheivan aschia era ina buna basa sociala per lur futur. Igl intent ed il senn d'ina tala musica giuvenila ein da francar vinavon la cultura da musica instrumentala da nies vitg. Plinavon duei cheutras era il temps liber da nossa giuventetgna vegnir promovius!